Magapatigayon sang half-day work-from-home ang Iloilo City Government subong nga adlaw, Miyerkules, kasunod sang gin-anunsyo sang Malacañang kahapon bilang kabahin sang pag-obserbar sang Semana Santa.
Sa interview sang Bombo Radyo kay Joy Fantilaga-Gorzal, spokesperson ni Mayor Raisa Treñas, iya ginpahayag nga suno sa ginpagwa nga Memorandum Order, ang mga empleyado sang syudad magatrabaho halin alas-8:00 sang aga tubtob alas-12:00 sang udto paagi sa work-from-home setup.
Ginmandu man nga suspendido ang regular nga trabaho sang gobyerno halin alas-12:00 sang udto tubtob alas-5:00 sang hapon bilang kabahin man sang pag-obserbar sang Semana Santa.
Samtang, ginpahamtang naman ang Blue Alert Status sa syudad agud masiguro ang seguridad sang syudad sang mga tawo.
Ila man ginapahibalo sa publiko nga wala sang onsite work, kag magaresume ang regular nga trabaho sa Lunes, Abril 6, 2026.
Gindumdum man ang publiko nga magbulig sa pagkonserbar sang enerhiya paagi sa pagpatay sang mga suga kag pag-unplug sang mga appliances kon wala ginagamit, agud malikawan ang disgrasya kag masiguro ang kaluwasan.
Sa pihak sini, ang frontline services sang syudad magapadayon sa normal nga operasyon agud maserbisyuhan gihapon ang publiko.
