ILOILO CITY – Magapatigayon sang lapnagon nga information dissemination campaign ang Iloilo City Government natuhoy sa COVID-19 vaccination program.
Ini ang kasunod sang pagpamalibad sa pagpabakuna batok sa COVID-19 sang 71% nga mga residente sang Iloilo City, santo sa resulta sang ginpanagtag nga COVID-19 Vaccine Consent Form sang gobyerno as of February 16.
9,731 ka mga consent forms ang nagikan sa 88 ka mga barangay sa syudad.
6,863 ukon 71% out of 9,731 ang nagapangindi nga magpabakuna batok sa COVID-19.
Samtang, 2,868 ukon 29% naman ka mga residente ang magapabakuna.
598 ka mga residente sang distrito sang Arevalo ang nakasabat sa nasambit nga consent form:
2,059 sa City Proper;
1,087 sa Jaro;
1,375 sa Lapaz;
142 sa Lapuz;
2,454 sa Mandurriao kag
2,016 sa Molo.
Sa interview sang Bombo Radyo kay Mayor Jerry Treñas, iya ginpahayag nga bangud madamo sa gihapon sang indi makahangop sang ka-epektibo sang bakuna batok sa COVID-19, pakamaayuhon niya nga maglunsyar sang padayon nga information campaign natuhoy diri.
Suno kay Treñas, pinaagi sa pagpakig-angot niya sa tanan nga media kag private sectors sa syudad sang Iloilo, tuman ka dako ang mabulig sini agud mapalapta ang importansya sang nasambit nga bakuna.
Ginpahayag sang alkalde nga sa tion nga mag-abot na ang bakuna nga ginbakal sang Iloilo City Government, magapanguna siya sa pagpatublok kaupod ang iban pa nga opisyal sang gobyerno agud mangin ehemplo sa publiko nga wala sang dapat kahangaw-an sa COVID-19 vaccine.
Nahibaluan nga nagpirma sang kasugtanan ang alkalde sang syudad para sa 600,000 doses sang bakuna sa British-Swedish multinational pharmaceutical kag biopharmaceutical company nga AstraZeneca nga ginalauman nga maga-abot subong nga Pebrero.
Ang nasambit nga doses ang bastante para sa 300,000 ka tawo ukon 60% sa populasyon sang Iloilo City.
