ILOILO CITY- May yara na lang sang nabilin nga 10 ka adlaw ang Iloilo City Government sa pagbaton sang iban nga private entity nga interesado sa pag-redevelop sang Iloilo Central Market kag Iloilo Terminal Market paagi sa Public Private Partnership (PPP).
Sa interview sang Bombo Radyo kay Mayor Jerry Treñas, iya ginpahayag nga ang SM Prime Holdings pa lang ang nagpabutyag sang interes para sa amo nga partnership apang kutob sa Hulyo 16 pa ang Swiss Challenge para sa iban nga pribado nga kumpaniya nga magtanyag sang ila offer.
Pahayag sang opisyal, kun wala na gid man sang bag-o nga potential player nga interesado para sa PPP,magapirma na sang kontrata ang syudad upod ang SM Prime Holdings kag diri na isa-isahon ang proseso tubtob nga mapatigayon ang proyekto.
Ginpasiguro naman sang alkalde nga wala sang ma-displace nga vendor nga maapektuhan sang proyekto kag sila man ang mangin prayoridad nga hatagan sang pwesto sa tion nga matapos na ang re-development sang duha ka mga merkado.
