ILOILO CITY – Apisar nga ang syudad sang Iloilo ang may pinakamanubo nga kaso sang dengue sa bilog nga Western Visayas, alarming sa gihapon ang madasig nga pagsaka sini.
Sa latest nga data sang City Health Office as of July 23, nadangat na sa 398 ang kaso sang dengue nga na-record sa syudad kun sa diin, nagsaka ini sang 84% kung ikumpara sa kaso nga na-record sang nagligad nga tuig sa amo man nga period.
Sa subong, nagapabilin nga isa sa gihapon ang napatay bangud sang dengue sa syudad.
Sa interview sang Bombo Radyo kay Iloilo City Mayor Jerry Treñas, iya ginpahayag nga kinahanglanon gid ang bulig sang tagsa-tagsa agud nga mahagan-hagan ang kaso sang dengue.
Sang nagligad nga semana, ginsapol sang alkalde ang tanan nga sektor kag posible nga masundan pa ini.
Nagpanawagan man ini sa publiko nga magtungod sang tagsa ka responsibilidad sa amo nga problema.
Ang Bombo Radyo Iloilo ang magabulig sa syudad sang Iloilo agud nga mapalab-ot sa mga Ilonggo ang mga nagaka-igo nga impormasyon agud nga malikawan ang pagduging sang makamamatay nga dengue.
