ILOILO CITY – Nagdepensa ang Iloilo City Government tuhoy sa kontrobersiya sa pagpanagtag sang mga Christmas giftpack sa mga barangay sa syudad sang Iloilo.
Sa interview sang Bombo Radyo kay Iloilo City Mayor Jerry Treñas, iya ginpahayag nga wala siya nakahibalo nga may mga nagareklamo bangud ginpanagtag pinaagi sa mga punong barangay ang tanan nga mga Christmas giftpack.
Ginpasalig man sang alkalde nga iya ipausisa ang mga barangay nga may nagareklamo nga pumuluyo nga wala makabaton sang Christmas giftpack.
Matandaan nga nagwangal ang punong barangay sa San Pedro, Molo, Iloilo City bangud sa iya ginapahayag nga “pagpamersonal” kag “pamulitika” nga natabo sa tagtaganay sang gift packs nga para kuntani sa mga pumuluyo sang ila nga barangay.
Suno kay Punong Barangay Karl John Lapascua, sa ila barangay, 176 kuntani ang recipients sang gift packs nga halin sa Iloilo City Government.
Apang, gin-repack ang gift packs sa Jaro Covered Gym kag ginkarga sang ila nga mga opisyal agud dal-on na sa ila barangay.
Wala nadayon ang pagdeliver sang gift packs bangud suno kay Lapascua, ginpapanaug ini liwat kag ginpahayag pa sang mga tawo sa Jaro Gym nga sila lang ang madeliver.
Ulihi na suno sa iya sang nahibaluan nga sa salakyan ni anay Barangay Kagawad Lornie Jordan ginkarga ang gift packs kag gindiretso sa ila nga balay.
