Nagpaandam ang Iloilo City Government sa mga ambulant vendors nga nagabaligya sa Sunset Boulevard sa Iloilo Circumferential Road nga magkuha sang business permit.
Sa interview sang Bombo Radyo kay Norman Tabud, head sang Iloilo City Business Permits and Licensing Office, iya ginpahayag nga kinahanglan nga magsunod ang mga vendors sa mga specifications lakip na ang size sang ila nga mga cart.
Suno kay Tabud, lakip man sa rekisitos amo ang kinahanglan nga mag-agi ang vendors sa training kag orientation antes makakuha sang permit.
Gin-athag man sang natungdan nga sugod subong nga adlaw, gina-require na ang tanan nga magbaligya sa Sunset Boulevard nga magkuha sang permit agud nga makapadayon sang Negosyo.
Nagpanugyan man ini sa mga vendors nga siguraduhon nga ‘safe’ ang mga pagkaon nga ila nabaligya.
Nagpasalig man ang pila ka ambulant vendors nga magsunod sa mga pagsulundad sang syudad.
Suno kay Reymund Desper, vendor sa Sunset Boulevard, magasunod na lang sila sa ginapangayo sang syudad agud nga tayuyon man ang ila nga palangitan-an.
Sa subong, business permit na lang halin sa Business Permits and Licensing Office ang kulang kay Desper kasunod sang paggawad niya sang mga permits halin sa ila barangay.
Una na nga nagpahayag si Iloilo City Mayor Jerry Treñas nga dumilian ang park shot ukon pag-inom sang makahulubog nga ilimnon sa Sunset Boulevard, lakip na ang mga nagabaligya.
