Iloilo City Government, nagpakigsapol sa mga pharmaceutical companies sa pagbakal sang COVID-19 vaccine

ILOILO CITY – Nakigsapol na ang Iloilo City Government sa kumpaniya nga AstraZeneca sa pagbakal sang COVID-19 vaccine.

Sa interview sang Bombo Radyo kay Iloilo City Mayor Jerry Treñas, iya ginpahayag nga sa tripartite agreement sang AstraZeneca, nakasaad nga dapat may yara sang 20 percent down payment.

Ang tripartite agreement ang ginabug-usan sang Iloilo City Government, Department of Health, kag AstraZeneca.

Suno kay Treñas, kun matigayon, mahimo nga mag-abot sa syudad sang Iloilo ang COVID-19 vaccine sa bulan sang Mayo.

Apang ginpahayag ni Treñas, kun indi mapirmahan sang Department of Health ang nasambit nga tripartite agreement, sa 2022 pa makaabot ang bakuna sa syudad.

Pahayag sang alkalde, magluwas sa AstraZeneca, nagpadala man sang brochure ang Sputnik kag may natalana naman nga pagsinapol ang syudad sa Pfizer.

Gin-athag man sang natungdan nga ang pagpa-inject sang bakuna ang boluntaryo lamang kag wala sang pilitay.