ILOILO CITY – Nagpanawagan sa national government ang alkalde sang syudad nga aktuhan na ang epekto sang padayon nga pagsaka sang presyo sang gatong sa pungsod.
Sa interview sang Bombo Radyo kay Iloilo City Mayor Jerry Treñas, iya ginpahayag nga kinahanglan na subong ang “urgency” bangud naga wi-it na ang transport sector nga amo ang direkta nga naapektuhan sang major price hike.
Dugang pa sang alkalde, dapat nga padali-on sang Department of Transportation (DOTR) ang paghatag sang ayuda para sa mga drivers kag operators.
Ginahingyo naman ni Treñas nga ipaidalom ni Presidente Rodrigo Duterte ang pungsod sa state of economic calamity agud nga makahatag man sang ayuda ang mga local government units.
