Nagpatigayon sang emergency coordination meeting ang Iloilo City Government may kaangtanan sa kakulangan sang tubig nga maeksperyensiyahan sang mga pumuluyo bangud sa water scheduling sang Metro Pacific Iloilo Water (MPIW).
Ang pagsinapol ginpangunahan ni Vice Mayor Jeffrey Ganzon nga amo ang acting mayor, kaupod ang department head sang City Engineer’s Office,City Health Office, City Social Welfare and Development Office, kag City Environment and Natural Resources Office.
Sa interview sang Bombo Radyo kay Ganzon, iya ginpahayag nga ginatutukan gid sang syudad ang problema sa supply sang tubig.
Gintawag pa niya nga krisis ini nga sitwasyon bangud ginakulang ang nagapanguna nga kinahanglanon sang pumuluyo.
Suno naman kay Mr. David Angelo Berba, Chief Operating Officer (COO) sang Metro Pacific Iloilo Water (MPIW), temporaryo lang ang water shortage.
Pahayag ni Berba, may kaangtanan ini sa maintenance activity sang Flo Water Resources Iloilo Inc.
Dugang ni Berba, nagapakig-angot man sila sa Flo Water angot sa maintenance activity sa planta nga nagsugod sang Lunes kag natalana ng magtakop sa Oktubre 21.
