Dako ang pagpasalamat ni Mayor Raisa Treñas bangud nakabaton liwat ang Iloilo City Government sang Unmodified Opinion halin sa Commission on Audit (COA) para sa Annual Audit Report nga naga-cover sang fiscal year nga nagtapos sang Disyembre 31, 2025.
Ini ang pinakamataas nga audit opinion nga ginahatag sang COA, nga nagapamatuod nga ang mga financial statements sang syudad patas nga na-presentar, insakto, kag nagsunod sa international public sector accounting standards.
Suno pa kay Treñas, isa ini ka maayo nga pasidungog nga naga-highlight sang kadalag-an sang syudad.
Naga-reflect man ini sang bug-os nga effort sang mga departamento, offices kag personnel nga mapisan nga ginatungdan ang ila nga trabaho agud masiguro nga ila ginapatuman ang accountability kag maayo nga serbisyo.
Nahibaluan nga ulihi nga nakabaton ang syudad sang amo nga pasidungog sang tion pa ni anay Mayor Jerry Treñas, nga suno pa kay Mayor Raisa nagapamatuod lamang nga nagapadayon ang syudad sa paghimakas agud mahatag ang maayo nga pagdumala sini sa publiko.
