ILOILO CITY – Pasidunggan sang Iloilo City Government sa kampanya batok sa COVID-19 nga Bato Iloilo, Bato Barangay ko ang pila ka mga barangay sa syudad sang Iloilo sa patigayunon nga flag raising ceremony subong nga adlaw.
Sa interview sang Bombo Radyo kay Punong Barangay Roberto Niño Jr., iya ginpahayag nga tagaan sang dungog pinaagi sa nasambit nga kampanya ang mga barangay nga may inisyatibo, practices kag may gin-atubang nga pagpanghangkat batok sa COVID-19.
Suno kay Niño, may apat ka kategorya ang mga ihatag nga award nga ginalakipan sang Most Active Sangguniang Kabataan, Most Active Barangay Council, Most Social Media Active, kag Search for the Most Active Barangay.
Nagadangat sa kapin 10,000 suno kay Niño ang ihatag nga award sa kada kategorya.
Pahayag sang natungdan, ang pila ka mga barangay nga tagaan sang pasidungog amo ang masunod:
-Punong kag Libertad Lapuz
-Javellana kag Buntatala Jaro
-Sto. Niño Norte Arevalo
-Zamora Melliza kag Veterans Village City Proper
-Rizal, Luna, Magsaysay Village, Lopez Jaena Norte Lapaz
-Tap-oc, Kasing-kasing kag Calumpang Molo
-San Rafael kag Airport Mandurriao
Katuyuan sini suno sa natungdan amo ang padayon nga pag-ugyon sang mga barangay sa gobyerno sa pagbato sa COVID-19 pandemic.
