ILOILO CITY- Target sang Iloilo City Government nga makalab-ot na sa 80% subong nga semana ang numero sang mga Public Utility Jeepneys (PUJs) nga magabyahe sa Iloilo City may kaangtanan sa ginapatuman nga Local Public Transport Route Plan(LPTRP).
Sa interview sang Bombo Radyo kay Mr. Jeck Conlu, pinuno sang Public Safety and transportation Management Office (PSTMO), iya ginpahayag nga sa subong, masobra na sa 1000 ka PUJs ang nagabyahe sa syudad gani mas madasig na ang circulation sang mga pasahero sa mga terminals.
Suno kay Conlu, mas maayo ang sitwasyon subong kun ipaanggid sang nagligad nga semana kag resulta ini sang pagpatawag ni Mayor Jerry Treñas sang pagsinapol sa tanan nga stakeholders gani naistoryahan kag nahatagan sang igtalupangod ang pila ka mga concerns.
Ginpasalamatan man ni Conlu and Land Transportation Office (LTO) kag ang Land Transportation Franchising and Regulatory Board (LTFRB)
sa pagpadasig sang proseso sang renewal sang registration kag issuance sang special permit sa mga PUJs agud makadugang sa units nga nagabyahe sa syudad.
Gindugang naman ni Conlu nga samtang amat-amat na nga nagakasolbar ang mga problema angot sa LPTRP, sunod nga umpisahan sang Iloilo City Government ang pag-improve sang infrastructure sa mga terminals agud may yara sang maayo nga pasilidad para sa mga commuters ilabi na kun nagaulan.
