ILOILO CITY – Plano sang Iloilo City Government nga i-convert sa electricity ang power source sang mga pump stations sa syudad.
Sa interview sang Bombo Radyo kay Mayor Jerry Treñas, iya ginpahayag nga nagagamit sa subong sang generators ang pump stations bilang power source.
Suno kay Treñas, gin-ubra lang sang Department of Public Works and Highways (DPWH) ang pump station nga wala natakod sa kuryente.
Paathag sang alkalde, gamiton lang kuntani ang generator sa tion nga wala sang kuryente bilang back up nga power source kun kinahanglan.
Ginklaro man ni Treñas nga Iloilo City Government ang magasto para sa pagbakal sang mga kinahanglan nga masaylo ang power source sang mga pump station sa electric power.
Dugang pa sang natungdan, gin-ayo niya sa DPWH nga himuon nga electricity ang power source sang mga ginaplano pa nila tukuron nga mga pump stations sa syudad.
Nahibaluan nga nagabalor sang ₱11 million ang tagsa ka pump station nga gin-turn over sa syudad.
Una na nga nagpromisa ang ahensya nga kay-uhon ang mga depekto sang pump stations.
