ILOILO CITY – Hulaton ni Iloilo City Mayor Jerry Treñas ang igapaguwa nga guidelines sang National Inter-Agency Task Force tuhoy sa pagpatuman sang Modified General Community Quarantine.
Sa interview sang Bombo Radyo kay Treñas, iya ginpahayag nga sa mga masunod nga inadlaw, magapaguwa na sang announcement ang National Inter-Agency Task Force apang subong pa lang, naumpisahan na niya ang close coordination sa iban nga Local Government Unit sa Western Visayas tuhoy sa exit plan.
Suno kay Treñas, may yara na nga daan sang exit plan para sa syudad sang Iloilo apang kinahanglan pa ini nga isanto sa guidelines nga ipaguwa sang National Inter-Agency Task Force.
Ginpahayag ni Treñas nga buhinan ang igapatuman nga restrictions kag ginalauman man ang pagdinaguso sang tawo sa syudad sang Iloilo kadungan sang pagbukas sang madamo nga negosyo.
Bangud sini, ginpahayag sang alkalde nga iya na nga ginpahibalo ang Public Safety and Transportation and Management Office tuhoy sa patigayunon nga adjustment.
Nagalaum naman ang alkalde nga sa Hunyo 1, ipatuman na sa syudad sang Iloilo ang Modified General Community Quarantine.
