ILOILO CITY – Kinahanglan nga matipon sa isa lang ka lugar ang locally stranded individuals agud nga mas mahapos ang pagpangita sang masakyan papauli sa syudad sang Iloilo.
Ini ang sabat ni Iloilo City Mayor Jerry Treñas may kaangtanan sa problema sang isa ka Ilonggo nga na stranded sa Baguio City sa sulod na sang masobra duha ka bulan.
Sa interview sang Bombo Radyo kay Treñas, iya ginpahayag nga madamo pa mga Ilonggo nga stranded sa Metro Manila kag sa iban pa nga bahin sang pungsod ang wala pa nakapauli.
Suno kay Treñas, ginapanugyan nga magtingob ang locally stranded individuals agud nga tingob man ang pagproseso sang ila nga pagpauli kag ginaduso man nga mahimo sila pasakyon sa barko nga pagasakyan sang repatriated Overseas Filipino Workers.
Ginpahayag ni Treñas nga mas makapaayo kun ang locally stranded individual nga yara sa Baguio City ang makapangita sang paagi agud nga makapadulong sa Metro Manila apang kun imposible, wala na diri sang may mahimo ang Iloilo City Government ilabi pa nga kanselado sa gihapon ang byahe sang salakyan.
