ILOILO CITY – Handa na ang Iloilo City Government may kaangtanan sa pagpatuman sang General Community Quarantine umpisa Mayo 16.
Sa interview sang Bombo Radyo kay Iloilo City Mayor Jerry Treñas, iya ginpahayag nga ginahulat na lang niya ang mangin anunsyo sang National Inter-Agency Task Force.
Suno kay Treñas, sa tion nga ipatuman na ang General Community Quarantine, mahimo nga may yara sang adjustment sa 8:00 PM tubtub 5:00 AM nga curfew kag sa baylo, himuon ini nga 9:00 PM tubtub 5:00 AM.
Ginpahayag ni Treñas nga mahimo na nga pahanugutan ang pagbukas sang mga convenience store kag mall apang may yara sa gihapon sang quarantine protocol nga dapat sundon.
Sa pagpaathag sang alkalde, indi man mahinago nga apisar ginpanubo sa General Community Quarantine ang syudad sang iloilo, indi sa gihapon madula ang kamatuoran nga yara sa gihapon ang virus tubtub nga wala pa sang bakuna batok diri.
May kaangtanan diri, liwat nga ginsapol sang natungdan ang Ad Hoc Committee may kaangtanan sa ipatuman nga exit plan apang ang ginakahangaw-an lang amo nga madula na ang Liquor Ban sa tion nga ipatuman na ang General Community Quarantine.
May kaangtanan naman sa workforce sang Iloilo City Government, sapulon sang alkalde ang tanan nga department head kag executive assistant.
Ang pagsinapol suno kay Treñas ang patigayunon subong nga adlaw, Mayo 12, agud nga maistoryahan na kun ano ang mangin plastada sang trabaho sa Iloilo City Hal.
Kun maplastar na ang work adjustment, mangin tayuyon na ang paghatag sang serbisyo kag pagpatigayon sang programa sang Iloilo City Goverment para sa ekonomiya sang syudad.
