ILOILO CITY – Nagakadapat nga may yara sang joint executive order ang syudad sang Iloilo kag ang probinsya sang Guimaras agud nga mangin matalunsay ang pagbaye sang mga pasahero nga nagasakay sa pump boat.
Ini ang ginkasugtan nanday Iloilo City Mayor Jerry Treñas kag Guimaras Gov. Samuel Gumarin sa pagsinapol matapos nga nagdinaguso ang mga pasahero sa Parola wharf kag wala na ginsunod ang physical distancing.
Sa interview sang Bombo Radyo kay Treñas, iya ginpahayag nga mas makapaayo nga may yara sang unified protocol nga ipatuman agud nga indi magsalangisag ang mga pasahero.
Suno kay Treñas, kun ano ang requirements kag protocol nga luyag ipatuman sang Guimaras Provincial Government, kasubong man ang igapatuman sang Iloilo City Government.
Ginpahayag ni Treñas nga ginaduso nga buksan ang Ortiz wharf kag pahanugutan nga magbyahe ang fast craft sa ruta nga Iloilo-Guimaras vice versa agud nga mabuhinan ang kadamuon sang pasahero nga nagapadulong sa Parola Wharf.
