ILOILO CITY – Indi na makabaton sang dugang nga job hires ang Iloilo City Government.
Sa interview sang Bombo Radyo kay Iloilo City Mayor Jerry Treñas, iya ginpahayag nga nagalab-ot sa P28 million ang dapat nga gastuhon sang Iloilo City Government sa pagsweldo sa pagabatunon nga mga job hire.
Suno kay Treñas, kulang na ang pondo sang Iloilo City Government bangud man sa pagbaton ni anay Iloilo City Mayor Jose Espinosa III sang tuman ka damu nga job hire agud gamiton sa pamulitika.
Magluwas sa sobra nga job hire, gin-akusaran man ni Treñas ang iya bilas nga naggasto sang tuman ka daku nga kantidad sa pagbakal sang pagkaon para sa PAG-ULIKID program.
Sa pihak sini, ginpahayag sang alkalde nga iya pangitaan sang paagi nga mapabalik sa trabaho ang mga job hire nga ginpahalin kag pahalinon naman ang mga job hire nga ginbaton ni Espinosa.
