Magamato-mato na ang Iloilo City Government sa pagbakal sang alcohol breath analyzers agud nga makabulig nga mapatuman sang husto ang traffic laws sa syudad.
Sa interview sang Bombo Radyo kay Mr. Jeck Conlu, head sang Public Safety and Transportation and Management Office (PSTMO), iya ginpahayag nga naga-canvass na ang syudad para sa sini nga device kag nakaistorya na sa Land Transportation Office (LTO) agud nga maka-acquire sini nga equipment.
Magluwas diri suno kay Conlu, may speed gun na kag sound meter nga ginagamit ang PSTMO.
Naka-schedule man ang PSTMO personnel agud nga ma-renew ukon ma-deputize liwat sa paggamit sang breath analyzer.
Ginkumpirma man ni Conlu nga sugod subong nga semana, gin-istriktuhan liwat ang operasyon batok sa mga motorista nga nagagamit sang modified mufflers, mga naga-overspeed, kag iban pa nga nagakomiter sang traffic violations sa syudad.
Kagab-i suno sa PSTMO head, 36 ang gin-isyuhan sang citation ticket bangud sa paggamit sang magahod nga tambutso, madasig nga pagpadalagan, kag pag-drive apisar indi rehistrado ukon lisensyado.
Matandaan nga ginlunsar anay ang Traffic Discipline Zone sa Sen. Benigno Aquino Avenue (Diversion Road) sa Mandurriao, Iloilo City agud istriktuhan ang mga motorista apang wala napadayon ang implementasyon bangud sa Covid-19 pandemic.
