ILOILO CITY – Magadihon sang mas mabaskog nga tikang ang Iloilo City Government agud nga madisiplina ang mga pasaway nga mga pamatan-on.
Sang damlag lang, ginpangkurisan ang poster sang syudad nga ginapahayag may kahimu-an sang mga pamatan-on.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, iya ginpahayag nga indi na madisiplina ang mga kabataan pinaagi sa kalmado nga pamaagi.
Suno kay Conlu, magasapol sila sa City Social Welfare and Development Office kag sa Women and Children Protection Desk sang Philippine National Police agud nga magdihon sang mas may ngipon nga approach agud nga masolbar ang amo nga problema.
Magasapol man sila sa mga eskwelahan agud nga mahibaluan kun may yara sang mga fraternities.
Ginakonsiderar man nila nga posible nga kabahin ini sang initiation rites sang mga grupo kun may yara gid man.
Ini bangud nga natabo ang vandalism isa ka semana matapos nagsugod ang klase.
Sa bahin naman sang ila opisina, pahayag ni Conlu, pabaskugon pagid nila ang paglibot sa kaagahon, ang tion nga ang mga kabataan ang masami nga nagagwa.
Magapakig-angut man sila sa mga barangay nga may yara sang madamo nga out of school youth kag may history sang kinagamo nga ginka-ulamiran sang mga pamatan-on.
