ILOILO CITY – Magahatag sang libre-sakay ang Iloilo City Government may kaangtanan sa patigayunon nga national transport strike sa Lunes, Setyembre 30.
Ini ang may kaangtanan sa pagpamatok sang transport groups sa pagdula sa mga daan nga unit sang mga depampasahero nga salakyan bangud sa Modernization Program sang gobyerno.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, iya ginpahayag nga may mandu na si Iloilo City Mayor Jerry Treñas nga magahatag sang libre-sakay ang Iloilo City Government paagi sa 18 ka salakyan nga gamiton sa pagpasakay sa mga pasahero.
Suno kay Conlu, kanselado ang klase sa tanan nga level sa syudad sang Iloilo kag kun wala man lang sang importante nga transaksyon, mas makapaayo nga indi na lang magbyahe.
Ginpahayag ni Conlu nga magabulig ang nanari-sari nga ahensya sang gobyerno kasubong sang Philipine National Police, Bureau of Fire Protection, Philippine Coast Guard kag Philippine Army.
Magluwas sa libre-sakay, magapahamtang man sang operation center sa Iloilo City Hall para sa monitoring.
