Iloilo City Govt., magapadala sang specimen sa Philippine Genome Center halin sa Uswag Molecular Lab agud matul-id kun may local variants sang COVID-19 nga nakasulod sa Rehiyon VI

Mas istriktuhan pa sang Iloilo City Government ang pagpatuman sang health protocol kasunod sa padayon nga pagtimbuok sang COVID-19 cases sa syudad sang Iloilo.

Sa interview sang Bombo Radyo kay Iloilo City Mayor Jerry Treñas, iya ginpahayag nga kalabanan sa mga nagadugang nga COVID-19 positive sa syudad ang lunsay close contact.

Suno kay Treñas, sa bahin sang Iloilo City Hall, kun may magpositibo sa COVID-19 nga isa ka empleyado, gilayon nga ginapaidalom sa lockdown ang isa ka opisina agud mapunggan gilayon ang paglatnanay.

Pahayag sang alkalde, ginhisugtan man nila sang mga local chief executive sang Western Visayas nga palawigon pa sa isa ka Semana ang ila hingyo nga moratorium sa Inter-Agency Task Force (IATF) sa diin indi anay pagpasudlon sa Western Visayas ang mga locally stranded individuals (LSIs) kag returning residents.

Apang ang mga overseas filipino worker ang pasugtan makasulod kag makapauli sa rehiyon.

Dugang pa sang alkalde, magapadala man sila sang mga specimen nagikan sa Uswag Molecular Laboratory sa Philippine Genome Center agud matul-id kun may yara na sang local variants sang COVID-19 nga nakasulod na sa Western Visayas.