ILOILO CITY – Hingyuon sang Iloilo City Government ang bulig sang Metro Manila Development Authority (MMDA) agud indi na masulit pa ang road mishap sa Sen. Benigno Aquino Jr. Avenue Mandurriao, Iloilo City sa diin nabungguan-patay sang Mazda MX5 sportscar ang mag-asawa nga principal kag manunudlo.
Sa exclusive interview sang Bombo Radyo Iloilo kay incoming Iloilo City Mayor Jerry Treñas, iya ginpahayag nga sa bulig sang mga consultant kag experts sang MMDA, ginalauman nga masolbar ang problema sa dalanon sa Syudad.
Suno kay Treñas, nakigsapol naman ini kanday Public Safety Transporation and Management Office (PSTMO) Head Mr. Jeck Conlu kag Iloilo City District Engineering Office Head Engineer Rodney Gustilo.
Pabutangan man sini sa Department of Public Works and Highways (DPWH) sang grills ang center island sa dalanon halin sa atubang sang Iloilo River Esplanade tubtub sa isa ka dako nga mall sa distrito sang Mandurriao.
Ipasirado man ang U-turn area sa lugar sa diin naaksidente ang mag-asawa nga Joe Marie Osano, 49 anyos kag Alnie Dinah Pet-Osano, 45 anyos.
Butangan man sang rumble strips ukon nagakudol-kudol sa dalan sa diin may yara sang pedestrian lane agud indi magdasig ang pagpadalagan sang mga salakyan.
Samtang, ginmanduan man ni Treñas si Conlu nga butangan sang mga traffic auxilliary ang mga pedestrian lane kag i-adjust man ang schedule sang ila duty.
Mahimo man suno kay Treñas nga mag-agi ang mga publiko sa underpass ukon alagyan sa idalom sang taytay deretso sa Iloilo River Esplanade agud indi na magtabok pa sa dalan.
Ginmando man ni Treñas ang pagdakop sa mga naga overspeeding kag nagatabok sa indi pedestrian lanes.
