ILOILO CITY- Nag- apelar ang Iloilo City Government sa Energy Regulatory Commission (ERC) nga punggan ang plano sang More Electric and Power Corporation (MORE Power) nga magpataas pa sa rate sang kuryente sa syudad.
Ini matapos nga naggikan sa rate nga P6.45/kwh sang Hulyo, nagtaas ini sa P7.99/kwh sang Agusto kag magataas pa sa P10.00/kwh sa masunod nga mga bulan.
Ang rason sang pagpataas sang rate sang MORE Power amo ang naguba nga submarine cable sang National Grid Corporation of the Philippines sa Amlan, Negros Oriental matapos ang ginpatigayon nga dredging operation sang Department of Public Works and Highways.
Sa interview sang Bombo Radyo kay Engr. Randy Pastolero,Executive Assistant to the Mayor fo Power, iya ginpahayag nga sa sulat nga ginpadala ni Mayor Jerry Treñas kay ERC Chairperson Agnes Devanadera, ginhingyo sang alkalde ang regulatory intervention sa pricing mechanisms ukon manduan ang NGCP nga resolbahon ang problema sa naguba nga submarine cable.
Suno kay Pastolero, ginpanindugan sang alkalde nga isa ka inhustisya nga ipapas-an sa konsumidor ang kapalpakan sang DPWH ukon NGCP.
Nagalaum naman ang alkalde nga gilayon nga mahatagan sang atensyon sang ERC ang amo nga apela.
