Nagapanawagan ang Iloilo City Government nga mahatagan gid sang nagakaigo nga solusyon sang National Government indi lang ang problema sa brownout, kun indi amo man ang nagataas pa gid nga presyo sang produktong petrolyo.
Sa interview sang Bombo Radyo kay Joy Fantilaga-Gorzal, Spokesperson ni Mayor Raisa Treñas, iya ginpahayag nga kun magapadayun pa ang nasambit nga problema sa pungsod, mas mangin mabug-at gid ang epekto sini sa publiko, ilabi na sa transport sector, fisherfolks kag micro, small and medium enterprises (MSMEs).
Suno sa iya, ang fuel price increase ang indi lang problema sang mga motorista bangud nagasunod man diri ang pagsaka sang pamasahe, presyo sang balaklon kag maga-apekto man sa income sang mga pumuluyo.
Ginpakigbahin man niya nga may ara man sang plano kag ginaplano nga mga lihok ang siudad kaangay sang fuel assistance paagi sa fuel coupons sa mga motorista, apang limitado lamang ang ila nga mga resources.
Nahibaluan nga nagapreparar naman ang City Government sa economic impact study sa ongoing brownouts sa siudad nga igapasa sa Department of Energy kag sa Office of the President agud mapakita ang epekto sini sa ekonomiya kag sa mga pumuluyo.
Tinutuyo man sini nga mahatagan sang dugang nga programa kag buliga ng siudad ilabi na ang apektado nga mga sector.
