ILOILO CITY – Nagapangita na sang dugang nga duta ang Iloilo City Government para mangin relocation site.
Sa interview sang Bombo Radyo kay Mayor Jerry Treñas, iya ginpahayag nga kulang na ang duta nga ginbakal sang Iloilo City Government para sa mga relocatee.
Sa subong suno kay Treñas, iya na nga ginpahibalo ang tuhoy sa nasambit nga problema kay Engr. Roy Fermiza, pinuno sang Iloilo City Urban Poor Affairs Office (ICUPAO).
Kun makakita sang duta nga sarang mabakal, ginpahayag ni Treñas nga luyag niya nga magpatindog sang tatlo tubtub apat ka panalgan nga housing unit agud nga makakinot sa espasyo.
Magluwas sa pagpangita sang duta para patindugan sang relocation site, plano man sang alkalde nga ipakaayo kag pabutangan sang air condition unit ang mga day care center sa syudad sang Iloilo.
