ILOILO CITY – Nagpanawagan ang Iloilo City Government sa publiko nga gamiton ang mga gin-provide nga comfort rooms sa mga relocated stalls nga nagikan sa mga merkado nga ginapaidalom sa rehabilitation kag indi magpangihi sa kun diin lamang nga bahin sang syudad.
Ini ang kasunod sa paandam ni Mayor Jerry Treñas nga pasakaan ang penalidad sang mga madakpan nga nagapangihi sa mga dalanon.
Sa interview sang Bombo Radyo kay Engr. Neil Ravena, pinuno sang City Environment and Natural Resources Office, iya ginpahayag nga ang ginabantayan subong nga lugar amo ang Ledesma St. padulong sa Tanza sa Iloilo City Proper.
Suno kay Ravena, ang mga tricycle kag taxi drivers ang masami nga nagapangihi diri.
Pahayag niya, may yara man sang gin-provide nga mga comfort rooms ang private partner sang syudad.
Ginpahayag ni Ravena nga natinluan na ang lugar apang magapakig-angut sila sa mga barangay officials agud nga ma-sustain ang katinlo.
Ginakonsiderar man sang syudad ang pagrekomendar sa ila private partner nga dugangan ang mga comfort rooms.
Nahibaluan nga base sa Anti-Littering Ordinance ukon Regulation Ordinance 2004-149 sang syudad, ang mga madakpan nga nagalapas diri ang multahan sang P500 para sa first offense; P1,000 para sa second offense; kag P1,500 para sa third offense.
