ILOILO CITY – Nagpatigayon sang sectoral meeting ang Iloilo City Government agud istoryahan kun paano matapna ang Novel Coronavirus.
Ginpamunuan ni Mayor Jerry Trenas ang nasambit pagsinapol kaupod ang mga tiglawas sang nanari-sari nga department sa Iloilo City Hall lakip na ang mga tiglawas sang Department of Health kag concerned agencies.
Sa pagsinapol, ginplastar ni Dr. Roland Jay Fortuna, Forcal Person for Novel Coronavirus sang Iloilo City Health Office, ang mga lihok nga ginapatuman kag ang mga igapatuman agud nga indi na maglapta ang nasambit nga virus.
Kadungan sang pagsinapol, may yara sang gindihon nga emergency plans kun sa diin magluwas sa Health Declaration Card sa mga pasahero sa eroplano, dapat nga may yara man sang close coordination sang City kag Provincial Health Office.
Sa interview sang Bombo Radyo kay Dr. Fortuna, iya ginpahayag nga para sa mas mahapos nga tracking sa mga pasahero, mas makapaayo man nga may yara sang Health Declaration Card ang mga pasahero sa barko apang ang problema lang amo nga kulang sa personnel ang tagsa ka health office.
Sa Iloilo, ginpahayag ni Dr. Fortuna nga mas makapaayo kun magbuligay ang City kag Provincial Health Office agud nga madali nga matumod ang mga pasahero nga nagpositibo sa Novel Coronavirus.
Sa bahin naman sang syudad sang Iloilo, activated naman suno sa natungdan ang Barangay Health Emergency Response Team ukon ang Task Force on NCov nga ginmandu sang Department of Interior and Local Government.
Magluwas sa pagtapna sang nasambit nga virus, isa man sa dapat handaan suno kay Dr. Fortuna amo ang kakulang sang hospital kag isolation rooms sa tion nga magdamo ang Persons Under Investigation.
Ginakabig naman sang Bureau of Quarantine nga isa sa daku nga pagpanghangkat ang mga nagalapta nga fake news.
Sa interview sang Bombo Radyo kay Dr. Gerardo Gavino, Medical Officer 3 sang Bureau of Quarantine Iloilo, daku nga pagpanghangkat para sa ahensya ang madasig nga paglapta sang peke nga impormasyon may kaangtanan sa Novel Coronavirus.
Magluwas diri, kulang man ang personnel sang Bureau of Quarantine suno kay Dr. Gavino agud nga magpatigayon sang inspection 24/7 sa mga paluparan kag pantalan.
Sa subong suno kay Dr. Gavino, 13 a ng personnel sang Bureau of Quarantine ilabi pa nga sakop pa nila ang Capiz kag Antique.
Sa pihak sini, nakabulig suno sa natungdan ang pagkansela sang flight sa Hong Kong apang indi sa gihapon madula ang kahangawa nga maglapta ang Novel Coronavirus bangud nga nagapadayon sa gihapon ang flight sa Singapore.
