Nagpatigayon sang clearing operations ang General Services Office (GSO) sa syudad sang Iloilo sa bahin sang Jaro river.
Sa interview sang Bombo Radyo kay Engr. Niel Ravena, head sang GSO, iya ginpahayag nga na-identify ang 18 ka mga barangay nga posible ginahalinan sang basura.
Suno kay Ravena, ginatinguhaan nila nga makainstall sang waste trap sa lugar agud mapunggan kag makuha gilayon ang basura apang padayon sa gihapon nga nagahaboy sang basura ang mga pumuluyo sa suba.
Ginpabutyag man sini nga indi lamang teknikal nga solusyon ang kinahanglan, kundi pati pagbag-o sang social behavior sang mga pumuluyo sa pagdisponer sang ila mga basura.
Isa sa ginlantaw nga rason amo ang presensya sang mga informal settlers nga indi malab-utan sang mga truck nga naga-kolekta sang basura, rason nga may iban nga napilitan ihaboy na lang ang basura sa suba.
Padayon nga ginapangitaan sang solusyon sang mga otoridad ang problema, kag ginatinguhaan nga masolbar ini antes mag-abot ang bulan sang Hunyo kag Hulyo, bangud magasugod na ang tyempo sang tag- ululan.
Nagpahanumdom man ini sa mga ang pumuluyo nga mangin responsable sa pagdisponer sang basura agud malikawan ang mas dako nga problema sa palibot kag sa komunidad.
