Iloilo City – Dismayado si Iloilo City Mayor Jerry Treñas bangud naangot ang isa ka empleyado sang Iloilo City Hall sa iligal nga pagbaligya sang propiedad sang syudad.
Ini matapos nakabaton sang report ang gobyerno kun sa diin may yara sang iligal nga pagbaligya sang rights kag pamalay sa lote sang Iloilo City Government sa Barangay San Pedro, Molo, Iloilo City.
Sa interview sang Bombo Radyo kay Treñas, iya ginpahayag nga ang nasambit nga empleyado ang nagaobra sa idalom sang Iloilo City Environment and Natural Resources Office kaupod sang isa ka barangay official sang amo man nga barangay.
Suno sa alkalde, ginaimbestigaran na sang City Legal, City Administator, kag Office of the Building Officials ang rason sa likod sang iligal nga pagbaligya sang duta kun sa diin naka-secure ang iban nga mga inidibidwal sang deed of sale sa duta nga ginapanag-iyahan sang gobyerno.
Nagpaandam naman si Treñas sa mga involved nga magapangatubang ang mga ini sang nagakaigo nga penalidad kasunod sang gin-obra nga iligal nga butang.
