Gilayon nga nag-responde ang kapulisan agud i-check ang Iloilo Provincial Capitol kag ang Iloilo City Hall subong nga hapon, Hunyo 14, matapos nga nakabaton sang ginaalegar bomb threat.
Sa interview sang Bombo Radyo kay Police Captain Melchor Tolentino, hepe sang Iloilo City Police Station I, iya ginpahayag nga nakalab-ot sa group chat sang Iloilo City Government ang mensahe nga naga-unod sang pagpamahog.
Sa mensahe sang nagpamahog, ginmensyonar sini ang Iloilo City Government kag ang isa ka kongresista sa probinsya sang Iloilo. Ginsugid sini nga magatanum siya sang lima ka bomba bwas, Hunyo 15, sa City Hall kag sa Provincial Capitol. Nagdugang pa ini sa iya mensahe nga pakadtuon man didto ang gobernador kag ang mayor sang Iloilo City.
“Congresswoman Doc Kathy Gorriceta Iloilo City Government Magtatanim ako ng 5 na (5 bomb emojis)
bukas sa City Hall at sa Provincial Capitol ng Iloilo punta kayo Nila Governor Toto Defensor at City Mayor Raisa Treñas para mamatay na kayo,” ang mensahe sang sender nga gin-share sang pulis sa Bombo News Team.
Wala man na-mensyonar sang tagpadala sang mensahe ang tinaga nga “bomba” apang naggamit ini sang lima ka mga emoji ukon cartoon-styled nga bomba.
Pagkatapos na-report sa pulis ang amo nga mensahe, gilayon nga gin-deploy ang mga personnel sang Philippine National Police Regional Explosive Ordnance Disposal and Canine Unit (RECU) VI.
Gindeklarar man nga cleared sa bomba ang City Hall kag ang Provincial Capitol, apang suno sa pulis, pataason ang security bwas kag may i-detail nga dugang nga mga personnel.
Padayon subong nga gina-trace suno kay Tolentino ang ginhalinan sang mensahe.
Nagpahanumdom ini nga isa ka seryoso nga sala ang pagpalapta sang bomb threat kag pat-od nga mangatubang gid sang criminal complaint kun mapamatud-an kun sin-o ang nagpadala sini nga pagpamahog.#
