Naglab-ot na sa apat ka kaso ang positibo sa monkeypox (mpox) sa syudad sang Iloilo, base sa pinakaulihi nga datos sang Iloilo City Health Office (CHO).
Sa interview sang Bombo Radyo Dr. Mary Ann Diaz, head sang Iloilo City Health Office, iya ginpahayag nga nadugangan sang tatlo ang kaso sang mpox, kun sa diin duha ang makabig nga new cases kag isa ang anay positibo sa resulta sang test nagligad nga semana.
Suno kay Dr. Diaz, nagapaayo na ang una nga kaso sang monkeypox sa syudad kag natapos na ang 21 ka adlaw nga isolation sang pasyente.
Ginpanugyan sang CHO sa publiko nga magpabilin nga alerto kag mag-obserbar sang mga health protocols pareho sang pagdistansya sa iban, regular nga pag-disinfect, kag pagsuksok sang face mask, ilabi na sa matawo nga lugar.
Gina-engganyo man sang CHO ang tanan nga makabatyag sang sintoma sang monkeypox nga magpa-test gilayon agud masiguro nga maagapan kag malikawan ang paglapta sini nga balatian.
Sa ginpatigayon nga pagsinapol sang CHO kay Mayor Jerry Treñas, ginpahayag ni Dr. Roland Jay Fortuna, CHO focal person, nga may plano ang alkalde nga mangayo sang bulig sa National Government sa pagpahugot sang mga pasilidad sang syudad nga mag undergo sang testing pananglit magpadayon ang pagtaas sang kaso sang mpox.
