ILOILO CITY – Nagpasa sang incident report ang City Health Office sa pagpamuno ni Dr. Annabelle Tang may kaangtanan sa natabo nga pagbata sang isa ka COVID-19 positive sa St. Therese MTCC Hospital.
Santo sa report, Setyembre 30, 2020 sang nagbata ang isa ka pasyente apisar nga wala pa ang due date.
Alas 9:00 sang aga sang amo man nga adlaw, nagreklamo sang labor pains ang pasyente rason nga naghatag sang assistance ang mga doktor kag nurses paagi sa pagatigayon sang Internal Examination (IE) kag padayon nga monitoring.
Alas 12:15 sang hapon, nagreklamo sa gihapon sang kasakit ang pasyente rason nga ginsaylo ini sa malaba nga sofa nga kitaon sa guwa sang hospital room. Ginpanugyanan ang pasyente nga himuon ang deep breathing exercises kag iban pa nga first aide agud nga mapahagan-hagan ang labor pains.
Bangud sini, gilayon nga nagtawag ang personnel sang City Health Office sa Western Visayas Medical Center COVID OB-Gyne Triage kag ang nurse on duty naman ang nagpanawag sa Iloilo City Emergency Response (ICER) agud nga mag-stand by bangud nga 3cm pa lang ang cervix dilation sang pasyente.
Ala 1:15 sa hapon, naglupok ang panubigan sang pasyente kag gilayon nga ginpahibalo ang ICER agud dal-on sa Western Visayas Medical Center ang pasyente. Samtang naga-ilis sang Personal Protective Equipment ang mga medical personnel, nagguwa na ang lapsag.
Ala 1:45 sa hapon, sang nasaylo sa Western Visayas Medical Center ang mag-iloy.
Tuhoy sa reklamo sang kapabayaan, ginpanindugan sang quarantine facility medical officers nga ginsunod ang tanan nga protocol para sa safety sang tanan.
