Nagpagwa sang pila ka mga rekomendasyon ang Iloilo City Health Office (ICHO) agud malikawan ang paglapta sang monkeypox ukon mpox sa syudad, kasunod sang pagtaas sang kaso sini.
Sa interview sang Bombo Radyo kay Dr. Mary Ann Diaz, head sang Iloilo City Health Office, iya ginpahayag nga kinahanglan magpabilin nga alerto ang publiko kag mag-obserbar sang mga health protocols pareho sang pagdistansya sa iban, regular nga pag-disinfect, kag pagsuksok sang face mask, ilabi na sa matawo nga lugar.
Madumduman nga nadugangan sang tatlo ang kaso sang mpox sa syudad, kun sa diin duha ang makabig nga new cases kag isa ang anay positibo sa resulta sang test nagligad nga semana.
Bangud sini, ginaengganyo sang City Health Office ang publiko nga kun may nabatyagan nga mga sintomas sang monkeypox pareho sang hilanat, rashes, kag kasakit sang lawas, dapat gilayon magpa-test sa mga health centers agud matapna kag malikawan ang dugang nga paglapta.
Sa subong, padayon ang pagpanghanda sang lokal nga gobyerno sang Iloilo City kag ang CHO sa mga tikang batok sa mpox, lakip na ang impormasyon kag pag-educate sa publiko tuhoy sa balatian.
Ginapahanumdom man sang ICHO nga importante ang kooperasyon sang tanan sa pagsunod sa mga patakaran kag pag-report sang mga sintomas agud maprotektahan ang komunidad.
