ILOILO CITY- Ginkalipay ni Iloilo City Mayor Jerry Treñas nga ginpamatian sang Department of Health ang iya hingyo nga dugang nga medical personnel para sa mga ospital agud mag-atender sa mga COVID-10 patients sa syudad.
Sa interview sang Bombo Radyo kay Iloilo City Mayor Jerry Treñas, iya ginpahayag nga may pila ka medical personnel nga gin-augment ang amo nga ahensya.
Suno kay Treñas, ang iban naman nga nurses, nursing aides, kag utility workers ang ibalik sa syudad agud i-assign sa vaccination centers nga plano sang Iloilo City Government nga idugang para sa mas madasig nga vaccine rollout.
Ginpahayag sang alkalde nga ang na-identify nga mga eskwelahan nga himuon nga vaccination centers amo ang Iloilo Science and Technology University, University of the Philippines Visayas, West Visayas State University, kag Iloilo City National High School.
Ini magluwas pa sa apat ka naga-exist na nga vaccination centers nga amo ang Central Philippine University, University of San Agustin, Ateneo de Iloilo, kag Iloilo Convention Center.
Dugang pa sang opisyal, plano man niya nga mag-assign sang isa ka punong barangay agud magserbe nga manager sa kada vaccination center.
Suno sa alkalde, mangin papel sang manager amo ang pagpasiguro nga bastante ang vaccine kag ang kinahanglanon sang mga tawo sa vaccination center kag ang pag-atender sang mga reklamo sang mga tawo.
Magluwas sa i- augment nga nurses, may ipadala man ang DOH nga dugang nga mga equipment kag bulong kaangay sang high flow oxygen cannula kag ventilators.
Ginalauman man ang dugang nga mga COVID-19 vaccines sang China-made Sinovac para sa Iloilo City sa 50,000 doses ang ginpain para sa syudad kag 100,000 doses naman sang bakuna ang ginpain para sa Western Visayas kag gintunga sa mga masunod:Aklan – 8,160 doses; Antique – 8,240; Bacolod City – 7,800; Capiz – 10,840; Guimaras – 2,520; Iloilo – 27,640; kag Negros Occidental – 34,800.
Samtang, ginpahayag naman sang alkalde nga may yara na sang ginkasugtan ang mga ospital kag ang Philhealth kasunod sang mga reklamo nga dako ang ginakuha sang Philhealth gikan sa mga COVID-19 patients apang wala man sang may ginabayad sa ospital ang ahensya.
Suno sa alkalde, magakadto ang Philhealth sa mga ospital agud mapangitaan sang paagi ang pagbayad kag pagbulig sa kinahanglanon sang mga medical institutions.
