Ipaidalom na sa Modified Enhanced Community Quarantine (MECQ) ang Iloilo City umpisa sa Agusto 16 tubtob 31.
Samtang palawigon man ang MECQ sa Iloilo Province sa kaangay man nga petsa.
Sa exclusive interview sang Bombo Radyo kay Presidential Spokesperson Atty. Harry Roque, iya ginpahayag nga mismo si Presidente Rodrigo Duterte ang nag-approve sang rekomendasyon sang Inter-Agency Task Force for the Management of Emerging Infectious Diseases.
Nagpasalig man si Roque nga ipalab-ot sa gihapon sa syudad kag probinsya sang Iloilo ang tanan nga ayuda kag cash-aid nga wala pa nakaabot sa idalom sang ECQ.
Magluwas sa Iloilo City kag Iloilo Province, ipaidalom man sa MECQ ang Laguna kag Cagayan de Oro City nga sadto anay ginpaidalom sa ECQ.
Lakip man sa mga lugar nga yara sa MECQ amo ang Apayao; Ilocos Norte; Bulacan; Cavite, Lucena City, kag Rizal sa Region 4-A sa Luzon; kag Aklan sa Region 6, Lapu-Lapu City, Mandaue City, kag Cebu City sa Region 7.
Samtang, ipaidalom naman sa General Community Quarantine ‘with heightened restrictions’ umpisa sa Agusto 16 tubtob 31 ang mga masunod nga lugar:
Ilocos Sur; Cagayan; Quezon kag Batangas sa Region 4-A kag Naga City sa Luzon; Antique, Bacolod City kag Capiz sa Region 6; Negros Oriental kag Cebu sa Visayas; Zamboanga del Sur; Misamis Oriental; Davao City, Davao del Norte, Davao Occidental kag Davao de Oro sa Region 11 kag Butuan City sa Mindanao.
Magluwas diri, ipaidalom man sa GCQ sa amo man nga petsa ang mga masunod nga lugar:
Baguio City sa Cordillera Administrative Region; Santiago City, Quirino, Isabela kag Nueva Vizcaya sa Region 2; Batangas kag Quezon sa Region 4-A kag Puerto Princesa sa Luzon; Guimaras kag Negros Occidental sa Region 6; Zamboanga Sibugay, Zamboanga City kag Zamboanga del Norte sa Region 9; Davao Oriental kag Davao del Sur sa Region 11; General Santos City, Sultan Kudarat, Sarangani, North Cotabato kag South Cotabato sa Region 12; Agusan del Norte, Agusan del Sur, Surigao del Norte, Surigao del Sur kag Dinagat Islands sa CARAGA kag Cotabato City sa Bangsamoro Autonomous Region sa Muslim Mindanao.
Ang Tarlac ang ginpaidalom naman sa GCQ umpisa subong nga adlaw, Agusto 13 tubtob 31.
Ang National Capital Region (NCR) ang napaidalom sa ECQ tubtob Agusto 20.
Samtang, ang Bataan, ang napaidalom man sa ECQ tubtob Agusto 22.
Ang mga wala nasambit nga lugar ang ipaidalom sa Modified General Community Quarantine (MGCQ) classification umpisa sa Agusto 16 tubtob 31
Samtang, nagpagwa na sang Executive Order No. 75 si Iloilo City Mayor Jerry Treñas angot sa pagpaidalom sa syudad sang Iloilo sa Modified Enhanced Community Quarantine umpisa Agusto 16 tubtob 31.
Yari ang kaundan sang pagsulundan:
- Dulaon na ang border control;
- Take-out and delivery lang ang pahanugutan sa tanan nga restaurant kag eatery;
- 9:00 AM – 2:00 PM lang ang Banking Hours;
- Pahanugutan ang Religious Gathering sa 10% Capacity;
- 9:00 PM – 4:00 AM ipatuman ang curfew;
- Ginalimitahan sa tatlo ka-adlaw ang pagpatigayon sang haya;
- Ginalimitahan sa immediate family ang pagpatigayon sang kasal, baptism, kag funeral;
- Bukas ang tanan nga Esplanade kag Plaza para sa [Walking, Jogging, Running ukon Biking];
- Pahanugutan ang pagbaligya sang makahulubog nga ilimnon umpisa 10:00 AM – 6:00 PM;
- Ginadumilian ang pag-inom sang makahulubog nga ilimnon sa pampubliko nga lugar;
- Ginadumilian ang tanan nga Sports Activities; kag
- Ginadumilian ang tanan nga Mass Gathering;
(BORDER SA SYUDAD)
Samtang, ginadumilian naman ang inbound travel sa Iloilo City magluwas sa mga masunod nga indibidwal:
- Returning Overseas Filipinos (ROFs);
- Authorized Persons Outside Residence (APORs); kag
- Returning residents
PARA SA MGA MATUMOD NGA CLOSE CONTACT SANG COVID-19 PATIENT:
- nagakadapat magpaidalom sa mandatory 14 – day quarantine kag reverse transcription polymerase chain reaction (RT-PCR) test.
