Mas ginpalawig pa tubtob sa Hulyo 15, 2021 ang Modified Enhanced Community Quarantine (MECQ) status sa Iloilo City kag Iloilo Province.
Ini ang ginlawag kagab-i ni Presidential Spokesman Atty. Harry Roque sa Talk to the Nation kaupod si Presidente Rodrigo Duterte kag mga myembro sang Inter-Agency Task Force (IATF).
Matandaan nga sang Mayo 23 una nga ginpaidalom sa MECQ status ang syudad sang Iloilo bangud sa nagataas nga kaso sang COVID-19.
Samtang ang probinsya naman sang Iloilo ang una nga ginpaidalom sa MECQ status sang Hunyo 16.
Sa subong, ang quarantine classification sang Guimaras, Aklan, Bacolod City, Negros Occidental, Antique kag Capiz ang ginpasaka na sa “General Community Quarantine” status gikan sa “Modified General Community Quarantine” status kag ini ang magalawig tubtob sa Hulyo 31, 2021.
Magluwas sa Iloilo City kag Iloilo Province, ginpaidalom man sa MECQ status ang mga masunod nga lugar;
Cagayan; Apayao; Bataan; Lucena City; Puerto Princesa; Naga City; Negros Oriental; Zamboanga Del Sur; Zamboanga Del Norte; Cagayan De Oro City; Davao City; Davao Oriental; Davao Occidental; Davao De Oro; Davao Del Sur; Davao Del Norte; Butuan City; Dinagat Islands;kag Surigao Del Sur.
Yari naman ang mga lugar nga yara sa GCQ status umpisa sa Hulyo 1 tubtob Hulyo 15;
NCR, Rizal, Bulacan, Laguna kag Cavite.
Samtang ang Baguio City, Ifugao, City of Santiago, Isabela, Nueva Vizcaya, Quirino, Batangas, Quezon, Zamboanga Sibugay, City of Zamboanga, Iligan City, General Santos City, Sultan Kudarat, Sarangani, Cotabato, South Cotabato, Agusan del Norte, Surigao del Norte, Agusan del Sur kag Cotabato City ang yara man sa GCQ status apang magalawig ini tubtob sa Hulyo 31.
Ang mga wala naman nalawagan nga lugar ang yara sa Modified General Community Quarantine.
