ILOILO – Nagapanawagan sang pagbinuligay ang Iloilo City kag Iloilo Provincial Government agud nga matapna ang paglapta sang Coronavirus Disease 2019 (COVID-19).
Sa ginpatigayon nga joint meeting kaupod ang tiglawas sang Department of Health kag mga hospital head, ginpahayag ni Gov. Arthur Defensor Jr. nga subong ang tion agud nga magbuligay ang government kag private sector.
Suno kay Defensor, tanan nga adjustments nga dapat ipatuman ang dapat nga himuon agud nga indi maglapta ang virus.
Ginpahayag man ni Defensor nga kinahanglan nga may yara sang isolation rooms ang tanan nga public kag private hospital para sa mga pasyente nga ginadudahan nga may yara sang sintomas sang COVID-19.
Kun kulang naman sa kinahanglanon ang mga hospital, kinahanglan ini gilayon nga ipahibalo sa Local Government Unit agud nga mapangitaan sang paagi.
Kinahanglan suno sa gobernador nga dugangan ang level of cooperation sang tagsa-tagsa.
