Ginalantaw sang Iloilo City Legal Office nga mahimo madutlan sang anti-graft and corruption ang anay administrasyon ni Former Iloilo City Mayor Jed Patrick Mabilog.
Ini kaangot sa lloilo Ferry Terminal sa Parola Wharf sa tion sang Mabilog administration.
Sa interview sang Bombo Radyo kay Atty. Joseph Edward Areño, City Legal Office, iya ginpahayag nga nakitaan nila sang madamo nga violation ang bahin sang joint venture agreement sa tunga sang anay administrasyon ni Mabilog kag sang Double Dragon Properties Corporation (DDPC).
Suno kay Areño, natukiban nga ang agreement ang indi rehistrado kag nahimo ang korporasyon sa tuig kon sa diin mismo ginpirmahan ang amo nga proyekto.
Gin-athag man sini nga ang amo nga korporasyon ang wala kontani sang pahanugot agud makasulod sa isa ka agreement.
Ginbuyagyag man sang natungdan nga nagpadala sila sang duha ka letter sa nasambit nga korporasyon, apang wala pa sila sang nabaton nga response.
Una na nga natukiban nga wala nagapasa ang korporasyon sang annual reports sa project operations, nga requirement man sa kasugtanan.
Kaangot sini, nagdepensa naman si Mabilog nga ang 2012 joint venture agreement ang makabenepisyo sa syudad sang amo nga tuig sa diin indi pa ini makabig nga ‘booming economic hub’, bagay nga ginkwestyon ni Treñas.
Gin-athag man sang anay alkalde nga wala naggasto ang syudad sang bisan isa ka sentimo ukon nag-loan para sa nasambit nga proyekto.
