Liwat nga nabaton sang Iloilo City ang pagkilala bilang Most Business-Friendly Local Government Unit (LGU) sa Highly Urbanized City category sang Philippine Chamber of Commerce and Industry (PCCI).
Ini ang personal nga ginbaton ni Iloilo City Mayor Raisa Treñas sa Metro Manila.
Sa interview sang Bombo Radyo kay Joy Fantilaga-Gorzal, spokesperson ni Mayor Raisa Treñas, iya ginpahayag nga bangud sang sunud-sunod nga kadalag-an sang syudad halin 2023, 2025, kag subong nga tuig, opisyal nga nasulod ang Iloilo City sa Hall of Fame sang PCCI.
Suno kay Gorzal, isa sa mga rason sang pagkilala amo ang mga programa kag ordinansa sang administrasyon nga nagahatag sang oportunidad indi lamang sa dalagko nga negosyo kundi pati sa micro, small, and medium enterprises (MSMEs).
Lakip diri ang Enterprise Incentives Ordinance, Negosyo Development Academy Ordinance kag Food Truck Ordinance.
Pahayag pa ni Gorzal, pinaagi sa Negosyo Development Academy, ang mga nagaplano nga magnegosyo ukon yara na sa Negosyo, ang makakuha sang training sa mga aspeto pareho sang financing kag branding.
Ginpakigbahin man niya nga yara na sa City Council ang Negosyo Credit Access for Resilient Enterprise ordinance sang alkalde nga nagatuyo nga makapa-utang sa mga negosyante kag mga MSMEs.
Suno sa iya, ginadiskusyon pa sang konseho ang mga kondisyon kag kwalipikasyon sang mga makabenepisyo sa nasambit nga programa.
Dugang pa ni Gorzal, ang award nga nabatun ang indi lamang kadalag-an sang alkalde ukon sang Iloilo City Government, kundi pagkilala man sa kontribusyon sang business sector kag sang komunidad sa pagpalapad sang oportunidad sa pangabuhian kag trabaho sang mga Ilonggo.
