𝗜𝗟𝗢𝗜𝗟𝗢 𝗖𝗜𝗧𝗬 — Wala napunggan sang mga opisyal sang Iloilo City Local Housing Office nga magpaguwa sang mainit nga tinaga bangud sa ginapahayag nga credit grabbing nga ginhimo ni Iloilo City Lone District Representative Julienne “Jam-jam” Baronda kaangot sa shelter assistance nga bulig sa mga nasunogan sa Brgy. Airport, Mandurriao, Brgy. Tanza Bonifacio kag Brgy. Rizal Estanzuela, Iloilo City Proper.
Sa interview sang Bombo Radyo kay Atty. Peter Jason Millare, Head sang Iloilo City Local Housing Office, iya ginpahayag nga sila tanan ang nag-asikaso sang mga dokumento nga kinahanglanon agud nga matigayon nga mahatagan sang cash assistance ang mga nasunogan.
Suno kay Millare, sang June 4 pa kuntani ma-release ang budget apang wala nadayon bangud sa pag-inagaway kun sa diin nga venue hiwaton ang payout, apisar pa nga ang lokasyon sang hiwatan sang payout ang naka-indicate sa memorandum circular 002.
Gin-athag man sini nga santo man sa nakasaad sa memorandum, ang Local Government Unit (LGU) ang direkta nga may counterpart sa amo nga programa kag indi sa opisina ni Cong. Baronda.
Ginakadismaya man sang natungdan ang nangin akto ni Baronda bangud kwarta sang pumuluyo ang gingamit sa cash assistance, apang gingamit man sang mamalidha agud makakuha sang credit sang programa.
Ginklaro man sang talatapan nga wala sang pulitika sa ila nangin panalambiton kag isa lamang ini ka akto agud hatagan sang kredito ang matuod-tuod nga nagtinguha agud matigayon mapanagtag ang cash assistance.
Nahibaluan nga natigayon ni Cong. Baronda nga mahatagan sang shelter assistance ang mga nasunogan sang nagligad nga semana paagi man sa bulig sang Department of Human Settlements and Urban Development.
