ILOILO CITY– Ginkumpirma ni Iloilo City Lone Dictrict Congressman Jerry Treñas nga matuod ang nagaginuwa nga impormasyon nga ginpangayuan ini sang P100 million sang kampo sang iya bilas nga si Iloilo City Mayor Jose Espinosa III agud gamitun sa ila natalana kuntani nga pag-updanay sa eleksyon.
Nahibaluan nga una nga nahisugtan nga si Treñas ang magapadalagan bilang mayor kag si Espinosa naman sa pagka congressman.
Sa exclusive interview sang Bombo Radyo kay Treñas, iya ginpahayag nga ginpatawag sang asawa ni Mayor Espinosa nga si Gina Sarabia Espinosa ang chief of staff sini nga si Jonas Belocello agud pangayuan ang kongresista sang P100 million.
Suno kay Treñas, duha ka beses nga ginpatawag sang iya bayaw nga si Gina ang iya chief of staff sa diin ginpangayuan niya ini sang downpayment nga P50 million.
Ginpahayag ni Treñas nga may yara ini sang mga text messages nga makapamatuod sang nasambit nga transaksyon.
Gintawag man ni Treñas ang iya mga in-laws nga ekstorsyonista.
Dugang pa sang kongresista dako nga kantidad ang kinahanglanon sa pagpadalagan sa eleksyon apang kun palangga ka sang mga botante indi na kinahanglan pa nga maggasto sang dako nga kwarta.
Sa bahin ni Espinosa suno kay Treñas, pat-od nga magasto ini sang dako nga kantidad. Samtang sa interview sang Bombo Radyo kay Mayor Espinosa, iya ginpanginwala ang akusasyon ni Treñas.
Suno kay Espinosa kaladlawan ang pahayag ni Treñas kag indi dapat nga patulan. Dugang pa ni Espinosa,wala na ini sang dapat pa nga ipaathag bangud istorya kuris-kuris lang ang pahayag sang iya bilas.
Ginkunpirma man ni Espinosa nga madamo pa siya sang alas nga ipagwa batuk kay Treñas
