MANILA – Magapaidalom sa 14-day quarantine sa Metro Manila si Iloilo City Lone District Rep. Jam Jam Baronda.
Ini ang kasunod sang iya nga pagtambong sa pagsinapol kaupod sanday Department of Budget and Management Sec. Wendel Avisado kag Department of Transportation Sec. Arthur Tugade kun sa diin ang duha ka tiglikom ang nagpaidalom man sa self quarantine.
Sa interview sang Bombo Radyo kay Baronda, iya gin-athag nga wala siya sang sintomas sang Coronavirus Disease 2019 (COVID-19) apang luyag lang niya nga sundon ang protocol agud nga indi na maglapta ang virus.
Suno kay Baronda, bisan nga flight na niya kun tani subong nga gab-i padulong sa Iloilo apang ipaiway niya anay ang pagpauli agud nga masigurado nga wala siya sang sintomas sang COVID-19.
Ginpahayag man ni Baronda nga importante ang proper hygiene ukon katinlo kag ang pag-inom sang bastante nga tubig, pagtumar sang vitamins kag ang pagkaon sang husto agud nga indi madali nga matapikan sang sakit.
May kaangtanan naman sa iya nga pagpakig-sapol kay Department of Health Sec. Francisco Duque III, ginpahayag sang mamalidha nga nangin positibo ang reaksyon sang tiglikom sa ginaduso nga himuon nga testing center ang Western Visayas Medical Center.
Kun madayon suno sa natungdan, indi na kinahanglan pa nga dal-on sa Research Institute for Tropical Medicine sa Muntinlupa ang samples agud nga mahibalu-an kun bala positibo ukon negatibo sa COVID-19 ang isa ka tawo.
