Wala pa man naka-abot ang legal order ni Iloilo City Mayor Jerry Treñas, nagvolunteer kag nag-umpisa na sa pag-render sang community service si si Iloilo City Lone District Representative Julienne “Jam-jam” Baronda kasunod sang iya paglapas sa COVID-19 protocol sang nagtambong sa isa ka pagtililipon sang Bureau of Fire Protection (BFP) Region VI sa Alta Tierra Village, Jaro, Iloilo City sang nagligad nga Hunyo 10.
Sa interview sang Bombo Radyo Kay Mr. Nestor Canong, pinuno sang compliance team sang Iloilo City Government, iya ginpahayag nga una na nagpanagtag ang mamalidha sang mga food packs para sa mga frontline workers sa mga vaccination site sang syudad.
Suno kay Canong, personal nga nagdul-ong, nagpanagtag kag nagpanghimos si Baronda sang kapin 400 ka food packs sa Central Philippine University, 350 sa University of San Agustin kag 250 sa Iloilo Convention Center.
Pahayag ni Canong, nagpasalig man si Baronda nga tubtob pa sa Byernes, Hulyo 9 ang iya community service pinaagi sa pagpanagtag sang pagkaon para sa mga frontline workers nga amo ang masako nga naga-atender sang COVID-19 vaccination.
Dugang pa sang natungdan, sa masunod nga semana magapadulong sa Manila ang mamalidha para sa pila ka trabaho sa House of Representatives apang nagpasalig ini nga sa pagbalik sa syudad sang Iloilo, magapatigayon ini sang clean-up drive sa mga barangay.
Matandaan nga Hulyo 5, sang nagpagwa sang legal order si Mayor Treñas may kaangtanan sa pag-community service sang mga nagtambong sa inagurasyon sang isa ka substation sa Alta Tierra Village, Jaro, Iloilo City.
Ang amo nga aktibidad ang ginpakamalaot sang publiko bangud nalapas ang protocol sa syudad nga pagdumili sa anuman nga sahi sang social gathering.
