Nagpasalamat si Iloilo City Lone District Representative Julienne Jam-Jam Baronda kay House Speaker Ferdinand Martin Romualdez kasunod sang pag-appoint sini kay Former Iloilo City Mayor Jed Patrick Mabilog bilang special adviser.
Gin-post sang kongresista ang mga laragway sang pormal na nga ginbaton ni Mabilog ang appointment sa atubang mismo sang House Speaker.
Suno kay Baronda, bilang Ilongga kag isa ka public servant, bugal niya nga makatindog kaupod sa mga tawo nga padayon nga nagatib-ong sang komunidad sa tampad nga liderato.
Mayo 1 sang nag-umpisa ang appointment kay Romualdez base sa official memorandum nga ginpirmahan ni House Secretary General Reginald Velasco.
Ginplastar sa memorandum nga importante ang kontribusyon kag mga panan-awan ni Mabilog sa iya field of expertise para nga mas mapaayo pa ang legislative agenda sang Kamara.
Wala pa nadetalye kun ano gid ang iya nga mga responsibilidad bilang special adviser ni House Speaker Romualdez, apang matandaan nga gin-anunsyo ang iya bag-o nga appointment sa final campaign sang Team Sulong Gugma sang Mayo 10 antes ang 2025 elections.
