Mas ginpalawig pa ang enhanced community quarantine (ECQ) sa Iloilo City tubtob sa Agusto 15, 2021.
Suno kay Iloilo City Mayor Jerry Trenas, ang hard lockdown sa syudad ang tubtob lang man sa Agusto 8 kag pagkatapos sini, magabalik ang Iloilo City sa ECQ.
Naganubo naman ang kaso sang COVID-19 sa syudad pahayag niya apang mataas ang hospital utilization rate sa diin kadam-an sa mga pasyente ang taga-probinsya sang Iloilo.
Samtang nagnubo naman ang quarantine classification sang Iloilo Province gikan sa ECQ nga subong yara na sa Modified Enhanced Community Quarantine (MECQ) epektibo subong nga adlaw tubtob sa Agusto 15.
Ini ang tikang sang Inter-Agency Task Foce agud nga mapunggan ang pagsipa liwat sang COVID-19 cases bangud sa mas makalalaton nga Delta variant.
Lakip sa ginpaidalom nga lugar sa ECQ amo ang Laguna kag Cagayan de Oro samtang MECQ naman ang Cavite, Lucena City, kag Rizal.
Sa statement ginpahayag ni Presidential Spokesperson Atty. Harry Roque, gin-aprubahan ni Presidente Rodrigo Duterte ang rekomendasyon sang IATF.
Ang Batangas kag Quezon ang ginpaidalom naman sa general community quarantine with heightened restrictions.
Nahibaluan nga ang Metro Manila ang yara man sa ECQ umpisa subong nga adlaw apang magalawig ini tubtob sa Agusto 20.
Una na nga ginsiguro sang Malacanang nga makabaton sang ayuda nga pinansyal ang mga pamilya nga apektado ang palangitan-an sa lockdown.
Sa subong, may yara na sang 331 nga kumpirmado nga kaso sang COVID-19 Delta variant matapos ini madugangan sang 116 ka mga new cases kahapon Agusto 5.
