ILOILO CITY- Ginatun-an na sang Iloilo City Government ang pagpatuman sang border restrictions sa kaiping nga mga probinsya sa Panay kadungan sang pagpaidalom na sang syudad sa Modified Enhanced Community Quarantine umpisa Mayo 24 tubtob Mayo 31, 2021.
Ini kasunod man sang pagpatuman sang Iloilo City sang border control kon sa diin indi pagtugutan ang byahe nga Iloilo City-Bacolod City ukon Iloilo City- Negros Occidental and vice versa bilang tikang agud indi na madugangan ang nagataas nga kaso sang COVID-19 sa syudad.
Sa interview sang Bombo Radyo kay Iloilo City Mayor Jerry Trenas, iya ginpahayag nga katuyuan sini nga mapanubo ang posibilidad sang pagdugang sang COVID-19 infections sa tion nga magsimpon ang mga pumuluyo sang syudad kag mga pumuluyo gikan sa kaiping nga probinsya ukon iban nga lugar sa Panay.
Suno kay Trenas, konsultahon pa niya ang natungdan nga mga Local Government Units angot diri.
