ILOILO CITY- Magalawig sang 12 ka oras ang scheduled brown-out sa Iloilo City kag Pavia, Iloilo sa Domingo, Abril 11,2021.
Sa interview sang Bombo Radyo kay Michelle Visera, Corporate Communications Officer sang National Grid Corporation of the Philippines, iya ginpahayag nga magaumpisa sa alas-sais sa aga tubtob alas-sais sa gab-i ang brown-out bangud sa patigayunon nga preventive maintenance.
Suno kay Visera, apektado diri ang More Electric and Power Corporation kag Iloilo Electric Cooperative ukon ILECO 1.
Sa bahin sang More Power, apektado ang substations sa City Proper, Molo, Mandurriao, Megaworld,Jaro kag Lapaz Feeder 1.
Sa bahin sang ILECO -1, apektado ang Pavia substation apang gin-athag ni Visera may mga feeders nga konektado sa substation sa Pavia nga masakop man sang brown-out kaangay sang Sta. Barbara.
Ginpahayag sang natungdan nga ang nasambit nga preventive maintenance ang nagatuyo nga malikawan ang mga unscheduled power interruptions sa palaabuton.
