ILOILO CITY-Nagbisita sa Syudad sang Iloilo ang Dutch Ambassador to the Philippines sang Royal Netherlands Embassy nga si Her Excellency Saskia Elisabeth De Lang.
Ini agud i-presentar kay Iloilo City Mayor Jerry Treñas ang proposal nga bike lane agud himuon ang Iloilo City bilang bike haven sa palaabuton.
Sa interview sang Bombo Radyo sa Ambassador, iya ginpahayag nga magluwas sa katuyuan nga himuon nga bike haven ang syudad, mangin solusyon man ini sa pagpahagan-hagan sang problema sang trapiko sa syudad.
Suno sa iya, indi mangin mabudlay nga mangin nga bike haven ang syudad bangud tradisyon naman sang mga Ilonggo ang pag-bike.
Gindayaw naman niya ang syudad sa aspeto sang land use planning kag zoning kag amo man si Mayor Treñas nga suno sa iya, dedikado nga mapatuman ang development sa syudad sang Iloilo.
Samtang, suno naman kay Mayor Treñas, ‘timing’ gid ang pagbisita sang Dutch ambassador bangud yara ang syudad sa proseso sang pag-update sang Comprehsive Land Use Plan.
Dugang pa sang alkalde, bukas gid ang syudad sa paglakip sa Comprehsive Land Use Plan sang proposal sa pagdevelop sang bike lane sa Iloilo City.
