ILOILO – Wala nagauntat ang mga proyekto nga nagapatahum sa syudad sang Iloilo apisar sang COVID-19 pandemic.
Sa interview sang Bombo Radyo kay Iloilo City Mayor Jerry Treñas, iya ginpahayag nga dugangan pa ang mga green areas sa palibot agud mapauswag ang air quality sa syudad.
Sa isa ka propiedad sang Panay Railway sa Brgy. Sambag sa distrito sang Jaro, plano sang Iloilo City Government nga tukuron ang isa ka I-Care Center agud mabutangan sang fire kag police personnel kag ambulansiya.
Pagkatapos sini suno sa alkalde, himuon nga isa ka tree park ang lugar kag pagatamnan sang endemic trees kaangay sang narra, kamagong, kag Iloilo Trees.
Dugang pa ni Treñas, bangud nalakip ang syudad sa mga benepisyaryo sang bamboo greening project sang Department of Environment and Natural Resources (DENR), una naman nga nabaton ang 5,000 bamboo saplings halin sa ahensya kag gintanom ang mga kawayan sa Calajunan Sanitary Landfill sa distrito sang Mandurriao.
May yara man sang kapin 200 ka ornamental plants nga gintanom sa Iloilo River Esplanade.
Ginpahayag sang alkalde nga sa Memorandum of Agreement (MOA) nga ginpirmahan kaupod ang Department of Environment and Natural Resources, nalakip ang inisyal nga pondo nga P5 million nga pagagamiton sa para sa mini forest sa Brgy. Lanit sa distrito sang Jaro.
